Ja ovo niš ne razumin...

Jutros san slučajno va najgornjen škafetinu (nisan špijal, nego san mislil da mi je tamo pala bala) našal teku na koj je pisalo „NE ŠPIJAJ!“. Već san rekal da ja ne špijan, nego mi je pala na pod i slučajno se oprla stranica Lutajući piše pismo prijatelju Merikanu. Tek san tada, kako bi rekal moj prijatelj Mujica još zi vrtića va Polju „skontal“ da je to tatina teka. Pročital san još nekoliko stranica, onako, slučajno. Začudil san se kako se tata pravi jako pametan, a kada ga ja neč pitan, samo nestane, ili, kako on sam reče, odluta za poslon. Tek san onda videl da su na svin stranicami ostali tragovi od nutele ku san provjeraval ako je kriva ili prava talijanska. Kolikogod san pokušaval očistit, teka je bivala sve šporkija i šporkija. Skril san ju pod postiju. Morda ja finin školu prije nego se nje donuisli.

Jutros san rekal tati neka moju nutelu ku će mi donest sveti Mikula dâ mojemu malomu prijatelju Gabrielu kako ča san lani poslal bonboni malomu Teu. Rekal mi je da je Gabriel bolestan i da to ne smi jist nego samo posebnu hranu ka je jako skupa. Pročital san da je onaj gospon ministar od zdravja Kujundžić, ki bi valjda rabil bit muška Gospa od Zdravja, rekal da niki ni dovoljno bogat da zliči sve. Kada san tatu pital da mi ovo objasni aš ne razumin, samo je rekal da mora poć ća...

Kada san ga neki dan pital zač druga dica jidu kruh i kolače bez glutena, on mi je rekal da su oni skupji. Rekal san mu da su oni valjda zdraviji pa će ih onda Gospon od Zdravja davat baren onimi ki su dovoljno bogati. A ča ćemo mi ki nismo. Samo je rekal neka ne govorin bedastoće aš da su i on, i mama, i baba i dede živi i zdravi i zi tin glutenon i... zbrisal je ća...

Isto mi se dogodilo kada san ga pital kada će zet godišnji odmor da gremo va Sloveniju pobirat jagodi. Začudil se je ovomu, pak san mu moral kako malon ditetu objasnit da čuda Slovenci zimaju godišnji odmor na proljeće kako bi ovdi mogli pobirat šparogi, a na jesen pečurki. Rekal san mu da nećemo mi to tamo delat va tujimi drmuni nego samo uz cestu, i da nećemo rušit njihove gromači. Opet je naglo nestal...

A kada san ga pital ča je to sinkopa, rekal je „hoj se mali igrat van zi dičinun“. Odmah je mama skočila da je vani grdo vrime i neka pusti maloga na miru.

Ma, meni se čini da moj tata lutalica još manje razumi od mene...

Ajme dosadno doma... gren ja skrit babi oćali da ne more gjedat televiziju aš ionako se vavik kara zi njun. Ala bog!