Mići Bodulić i Blažena Divica Marija

Danas je Bezgrješno začeće Blažene Divice Marije. Bil san na maši zi bakun. Pop je neč predikal o Isusićevoj materi. Ni čudo da čuda toga nis razumil, a i mislil san kako bi bilo lipo da Rika danas dobije utakmicu i poprti se na vrh.

Kada smo došli doma, mama je motala oko prsta, ovoga puta ne tatu nego makaruni, dok je tata neč internetal na kompiću. Iskoristil san priliku dok je šal zapalit cigaretu da ga neč pitan ča jutros nis razumil. Zaninalo me je kako to da je Isusićeva mama blažena, a njena prijateljica Magdalena sveta? Morda zato ča je divica, a Magdalena ni. Počel mi je objašnjavat da divica ne znači sluškinja nego... onda me je sprašil da gren složit do kraja onu puzlicu ku mi je donesal sveti Mikula.

Brzo san to finil i bilo mi je dosadno. Čul san da se sestra spravja poć na veronauk. Pital san ju ako moren poć zi njun. Malo me čudno pogjedala i rekla da će mi tamo bit dosadno. Rekal san da neće, aš me zanimaju neke stvari. "Ma ča to?" - začudila se. Rekal san njoj da bi pital vjeromeštricu ono ča mi tata ni znal ili ni otil odgovorit, kako to da je Isusićeva mama blažena, a njen muž Osip, ki ni Isusićev tata, sveti? Još bin pital da li je bezgrješno začeće neč kako i umjetna oplodnja... sestra je samo zavrtila zi očimi i repom i zbrisala.

A ja i dalje ostajen va neznanju.

(Mići Bodulić)