Štorija Marije Gračaković: Kolijani

Pasal je Božić, naš najlipči blagdan Isusićevoga rojenja. Veselilo mu se i staro i mlado. I sve je bilo kako tuka i kako Bog zapovida. Božić je veli blagdan ki nikad ni zgubil lipotu i svi mu se zaklinjemo da ćemo bit čin bolji ljudi. I rabi: molit, darovat, oprostit.

Danaska, drugi dan za Božićen, je Stipanja. Se uža reć: za velin blagdanon pride jedan mali. Ma Stipanja je u moji spomeni istešo jedan lipi i ne mali blagdan. Jima i jako lipu užancu, a to je na Kornić koledba (u drugi deli otoka se zove koledva), a oni ki ju delaju su kolijani (kolejani koledvari,…)

Užanca koledbe poteže svoji koreni od poganskih vrimen, a na Kornić dura odkad se ljudi spominjaju. Damir Kremenić piše da smo ju verovatno prezeli zi antike: stari Rimljani su prvi misec zvali: kalende, a u staroslavenski jezik kalenda je Mlado leto.

Stipanja je večer. Po selu se čuje kanat i huhuzdanje. To gre kumpanija kornićarskih mladići – kolijani. Gredu kantajuć od kuće do kuće kadi su divojke ma poštimaju i druge malo vijenije fameje. Na vrata od prve kuće bate i kantaju:

„Dobar večer, Bog daj, fijole,
Tomu gospodaru, fijole.
Našli smo mu vrata, fijole
Da bi, Bože, zlata, fijole
Za pozlatit vrata, fijole.“

Ki je, pita gospodar zada zatvorenih vrat.

Kolijani, složno odgovore mladići. Dalje govore da su oni kolijani „ki su bil i lani“ i da išću „staru užancu“. Gospodar zapovida da kantaju koledbu, al da zmole Očenaš. Potle toga opet more počet kanat:

„Na put su nan pravili, fijole
Da ste „hrnca“ palili, lelele.
(…) dajte nan ga manko pol, fijole
Da ne gremo u tuj dvor, lelele.“

Kolijani se još nisu štufali, kantaju dugu pjesmu, a saki gospodar jih rado prijeme u kuću, lipo jih počasti, daruje vino, a u vrnju klade kobasice i jaja. Tako noć pasuje u lipo veselje i kanat, a ni kuće ka jih ne bi počastila i lipo prijela. Mladići gredu kantajuć od vrat do vrat, prijimaju dar i zahvaljuju: „A sad lipa hvala, fijole.“

Na blagdan Tri kralji se, od onoga ča su dobili, spravlja vičera za kolijani, a u zadnje vrime i za divojke.

U nike druge mesta na otok (Dubašnica, Gabonjin, Vrbnik, Omišalj) koledba (al koledva) je bogatija, oni jimaju i kralja od kolijani, a mi smo kuntenti da se naša kornićarska ni, u ovo moderno vrime, zatrla. Uža se reć:bolje da se zatare selo, leh užanca. Selo se neće zatrt, aš: zida se, zida, zida… Prihajaju furešti kih ni čudo briga za naše užance, ma ne smi se popustit. Mladići kuraja!

Srićni van blagdani, „a sad lipa hvala, fijole“.

(Marija Gračaković „Štorije od besed“, Crikvenica, Kornić 2013.)