Blagdan sv. Lucije - Lucijina

Sveta Lucija, zaštitnica ratara, slijepaca (tjelesnih i duhovnih), lađara, staklara, krojača, pisara i vratara, na otoku Krku se slavi u Jurandvoru i Krku.

Pasala nan je Katarinjina, pasala je i Mikulja, još „jedan put poć spar“ i, eko, snami je Lucijina. Sve sami lipi i šimani blagdani na kraj leta. Se uža reć: „Katarina fora van, do Božića misec dan.“

Nič slično bi se moglo reć i za Lucijinu, samo „do Božića dvanajst dan“, al kako se u Konavli reče: „Sveta Luca drvarica, dvanajst dana do Božića.“

Sveta Lucija je jena važna kršćanska svetica, sicilijanska djevica zi Sirakuze ku se štuje od petoga vika. Lucija, Luce, Luca, lat. Lucia znači „svitla“ i nje blagdan navišćuje svitlost božićne noći.

Zaštitnica je ratari, tkalci, kovači, barkarijoli, a u prvi red, po čemu je kol nas najviše štimana, očinjega vida. Na svete slike ju poznajemo po rani od bodeža ku jima na vrat i po oči kih drži sprid sebe na pijat.

Na blagdan svete Lucije se sije šenica ka do Božića lipo i gusto naraste do dvajsetak centimetri. Sije se u zdelice, al u dumboki pijati. Klademo ju u jaslice al na božićni stol. Znenadit ćete se kad van rečen da ta užanca, da se šenica sije, živi samo u Portugal, južnu Taliju i u našu Hrvasku.

Saki od dvanajst dani od Lucijine do Božića sinbol je jenoga od dvanajst miseci u leto i po njimi se „gata“ kakovo će vrime ki misec bit.

Divojke veruju da će njin bit muž on mladić koga u noć Lucijine sanjaju.

U naši se kraji, od svega ča san nabrojila, svetu Luciju najiviše štima kako zaštitnicu vida. Čudo je crikvic, njoj posvećenih, kadi se je na dan 13. božićnoga hodilo na prošćenje. Skrušeno se je molilo svetu Luciju da pomore zaštitit ono ča je sakomu čoviku najvridnije – vid. Ljuden se ni grustilo po noći se stat i poć hodeć do crikvice svete Lucije.

Malo zvan Veje prema Puntu je jena takova crikvica i spominjan se da san tamo hodeć šla zo babu Maru. Po tomu poslu – na prošćenje. Reče se „kol svete Lucije“. Nigda je ta crikvica bila na osamu, a danaska, kada se je grad Veja i na tu bandu proširil, okolo nje su nove kuće. I tako sveta Lucija više ni „sama“.

Neozdavna je crikva lipo obnovljena, a na nje blagdan susedi prontaju veli stol i najlipče ča moru počaste svih ki pridu na mašu i na prošćenje, Jako lipo i sake pohvale vridno, almeno u današnje vrime kad su se ljudi tako „otuđili“. Tribida jih je njihova svetica potaknula na dobrotu i krijancu.

Na našu ižulu je najpoznatija ona crikva u Jurandvor: po svetoj Luciji i po tomu ča je u svoje njadra očuvala naše najveće blago, najvridniji naš kamik, Bašćansku pljoču.

Čera mi je pravljala jena draga Crikveničanka, teta Jelena ka jima osandeset i osan let, kako je u vrime svojega ditinjstva i mladosti sako leto zo svoji roditelji i čudo drugih Crikveničani hodila na zornicu svetoj Luciji u Zagori (danas Novi Resort). Rabilo je hodit okolo osan kilometri, a zornica bi počela na pet i pol jutrin pa se je rabilo stat okolo ure za pol noći. Ma niš njoj to ni bilo teško, aš je verovala, a i danaska je sigura, da njoj je sveta Lucija pomogla, aš je bila oslipila od plive kada se je žito vršilo i vijalo.

Ta crikvica u Zagori je i danaska očuvana i jutro će u nju, da se lipa užanca ne zatare, bit maša, ma ne zornica, leh maša u „normalno“ vrime, a ljudi će prit, ne hodeć, leh zo avti, velečasni istešo, Tako će se svi opet zo avti doma tornat. I mislit će na vrime skroz dvanajst dan, a zaparat će njin se da već vide svitlost Božića.

***

A vi divojke, atento koga ćete noćaska sanjat. Da ne bi bil kakov farabut!

--------------

pliva = pljeva – 1. ljuščice žitnog zrnja koje pri vršidbi otpadaju;

2. pren. nešto što je male ili nikakve vrijednosti

(Marija Gračaković: „Štorije od besed“, Crikvenica; Kornić 2013.)