Štorija Marije Gračaković: MOT

Vrime je od maškar. 16. je vik. Dubrovčanin Marin Držić ki vero mota za komediju jima piše svoju dramsku igru „Novela od Stanca“. Sama beseda „novela“ po dubrovačku znači šala, a Stanac je ime Vlaha, seljaka zi okolice ki je u Grad prišal prodat „kozle i grudicu“ ča će reć kozlića i sir.

Kako je štajon od mesopusta na ulice i kale dubrovačke jako je živo. „Feštaje se“, a on ne more nigder nać prenoćište. Stisnul se je blizu jene funtane i drhće od straha. Tote blizu pasuju dva mladića Miho i Vlaho ki su omaškarani i pojidaju se kako bi se tu noć ča lipče zabavili kada su već pod kuntrabant ušli od dome. Rugaju se svojin „smišnin“ (glupim) ocen ki misle da u kamaru spe. Na ulicu se u škurinu pokaže još jedan omaškarani lik. Mladići ne znaju ki je, ni kakove su mu namjere. „Cumpare, fa motto!“ (Kume, daj znak!) govori mu Miho, a on njin pravi da je šoto krabunosnice (maske) njihov poznanik Dživo Pešica i da bi tomu Vlahu rabilo „kugodi novelu“ delat, ča će reć narugat mu se, zdrhnut ga, osramotit.

I tako štorija gre naprid, hantavi mladići su opravili ča su namislili, a mi ćemo se fermat na „fa motto“ (daj znak).

Mot (tal. motto) je dogovoreni sinjal, znak zo bilo kin delon tela onako kako je dogovoreno, a da drugi zbande ne razume. Šempre se za mot zašćili (namigne), malo zo nogu rine spod stola i slično. U kumpaniju i danaska naši mladići znaju dokončat da će bit „atento na moti“ posobojno kada su divojke „u igru“.

U naš govor se šempre koristi i „frazem“ jimit mota ča znači da ti nič jako dobro gre, da si pratik u niki posal, a moreš jimit mota i za zabavljat se, tancat, maškarat se, za lipo se oblić, za šit, za štikat, plest, kuhat, slatko peć…

Ma za sve ča delaš: na šempljasto, na vridno, pametno – moraš jimit mota. I to se na čovika od malih nog vidi. Matere, ke se pojidaju da njin hćere neće bit dosti vridne, pa da zato neće ni pravoga mladića za ženidbu nać, zijaju na njih: „Ma ti vero za nikakovo delo nimaš mota!“

I ča će brižne hćere leh pocito same vase zamrmat: „Ma vrag zel i delo, iman ja mota za mladića nać, zi ruke će mi jist, a moja mat samo na to prokljeto delo misli. Neće ne posal uć. On te zada sakoga kantuna čeka. Ma je vrime od mesopusta, rabi jimit mota za maškarat se, zabavit, mladićen glavu smutit. A za to, hvala Bogu jiman mota. I to mi je za seda dosta. Bit će vrimena za pojid, delo, za njoki i šurlice pripravljat. A večeraska ću se u kraljicu maškarat i ki mi ča more.“

Gorinci bi rekli: „Živio Pust!“

I na finjencu: priznajte da je rabilo jimit mota za svih vas domislit ča je mot i ovizat vas da čovik za nič vero mora jimit mota.

(Marija Gračaković)