PlodiMe Mićega Bodulića
Milovan Kirinčić 21.10.2022.

Na našoj lipoj Boduliji postoje vele butige ke se zovu Plodine, a ne kako zna mama reć tati PlodiMe.
I tako je jedan barba od vejanskih Plodina došal doma zi pečenun kokicun, aš da mu je dosta jist zelenjave. Ali kad su počeli blagovat, ustanovili su da je kokica smrdljiva i nejestiva, ča je bilo dobro aš su nastavili papati zdravu hranu. Bile su zadovoljne i maški aš njin je bilo dosta onih kuglica. A kad malo bolje razmislin, i oni su bolje pasali aš je pečena kokica jeftinija od one pakirane hrane za maški.

Postoji još jedna vela butiga zi tin imenon, ali ne va Malinskoj, kako krivo reku, nego va Sv. Vidu Miholjice. A tamo imaju vagi ka svaka pokazuje drugu težinu.
Neki se jade i brundaju, a meni je baš fora. Ja bin savjetoval onimi ki vole igre na sriću neka ne gredu va kockarnice, nego va Plodine i tamo probaju sriću na vagami. Ako pogode pravu, zašparat će dosta šoldi na voću i povrću.
Čul san još da va tin butigami neki zemu neč kadi piše da je na sniženju, a tek na kasi skuže da je sniženje bilo, ali do prije nekoliko dan, a butigirke su "zaburavile" skinut harticu Sniženje. Ja san mići, ali ipak bin savjetoval neka ne budu škrti Boduli i neka zaobilaze sniženja pa se neće osjećat prevareni i mirnije će spat.
Pročital san na tportalu da je lani "Najveći domaći trgovački lanac Plodine zadržao četvrtu poziciju s 4,4 milijarde kuna prihoda. Tvrtka u vlasništvu Mile Ćurkovića bilježi nešto sporiji rast od ostalih vodećih lanaca, ali zato se može pohvaliti visokom dobiti (165 milijuna kuna) i natprosječnom operativnom maržom". Ma baš lipo kako se ovaj naš "najveći domaći trgovački lanac" trudi da ne pade na peto mjesto!
(Mići Bodulić)





