Ja opet niš ne razumin...

Milovan Kirinčić

Otok Krk - otok-krk.org, Lutajući Bodul - Ja opet niš ne razumin...

 

Božić je judi, Božić je judi, Božić je Isusić se rodil... slušan kako na radiju kanta Šajeta. A tu je pjesmu kantal i sinoć va Malinskoj kada je rekal da su dva najveća pjevača zi Opatije on i pokojni Ivo Robić, samo da je Robić bil Mister Morgen, a on je onda Malo Morgen. Samo mislin da se je on malo smutil, aš Božić je jutro. Danas je Badnjak, a čera je bil... niš. Ne razumin baš...

Danas smo bili na Badnjen jutru va Veji poslušat kako lipo kanta moja prijateljica Andrina Frleta. Pital san tatu ako ju poznaje. Rekal je da da, i da je bil prijatelji i zi njenin ocen i dedon... Hvala Bogu da su počeli svirat, aš bi sigurno nastavil sve do Frleti ki su živili va vrime krčkih knezi Frankopani. Tamo smo kupili novi borić aš mu je onoga koga je sinoć okitil neki porušil. Rekal san mu da nis ja nego maška. Niš ni rekal, morda se ni domislel da mi uopće nimamo mašku nego pasa.

Tamo mi je namazal na kruh bakalaj. Baš je bil fin. Pital san doma zač i mi nimamo bakalaja. Rekla je mama da je jako skup i da mi nimamo šoldi za njega, da to jidu samo bogati. Javila se mamica i rekla da su oni nigda jili bakalaj ne samo na Badnjak nego i petkom. Rekal san joj da su onda oni bili bogati. Rekla je da nisu, nego su to jili aš su bili siromašni. Ne razumin...

A ne razumin ni ovo vrime i prirodu. Mamica je pravjala da su muhe i komarci leteli po letu, kada i kaške. Ne mislin da su i one letele, nogo da ih se moglo vidit samo priko leta. A sada muhe i komarci lete sve okolo nakokolo, ali i kaški, ne lete nego gmižu i sada... vidite sliku tu šoto, litratana je čera va Malinskoj. A Božić je judi.... ni ovo ne razumin... valjda su i oni zgubili kalendar kako i Šajeta.

Pokušal san razumit kako ona naša šesna predsjednica ku je tata gjedal kada je bila va bikiniju, ali kada mame ni bilo doma, kako ona posluša savjete nekih savjetnika da makne neke druge savjetnike... ma nis uspjel...

Ma ne razimin još puno toga, ali moran poć na dičju polnoćku. Morda i tamo pridu Dedi Mraz i Božićnjak zi bakalajon, aš će tamo sigurno bit i bogatih judi.

Ja ne znan lipo pisat čestitki pak ću van samo čestitat Božić i ono drugo ča pride posli njega... zaburavil san ča, Šal bih pitat mamicu, ali još se jadi ča san njoj skril šćapić i na mesto njega stavil šibu ku mi je dal sveti Mikula... treći, valjda, aš četrti je Frankopan.

Mići Bodulić

http://otok-krk.org
 

Vijesti iz Krka - Događanja

Otok Krk - otok-krk.org - Obavijest
Događanja

Obavijest

Žao nam je, ali nakon 16 godina svakodnevnog informiranja o dnevnim događanjima s otoka Krka, više ih ne možemo voditi. Portal ćemo i dalje voditi koliko budemo u mogućnosti, ali gasimo kolumnu "Dnevne informacije".

Ispričavamo se stalnim čitateljima ovoga našega nezavisnog internetskog portala.

ZAHVALJUJEMO NA SUFINANCIRANJU ZA 2024.

Galerija - otok-krk.org

Galerija - otok-krk.org

Horoskop - otok-krk.org

Horoskop - otok-krk.org

Online izdanje - i do 80% popusta

Glas Istre Današnje izdanje (i do 80% popusta) by otok-krk.org Novi List Današnje izdanje (i do 80% popusta) by otok-krk.org