Komoštranje va Krku
Milovan Kirinčić 21.12.2014.

.
U noći uoči Badnjaka (23.12. na 24.12.) ko vas ča zbudi oko pol noći va staron delu grada Krka, ne brinite aš to će komoštre roštat. A ča su to komoštre i zač se s njimi rošta, morda malo ki zna, ma zato smo mi tu da van pravimo. Komoštre su kadene ili da pravin da me razumite: lanci na kojima su nad ognjištem u primorskim kućama visile posude u kojima se kuhalo (brunci za palentu npr.). A zač se s njimi rošta, i to ću van pravit.
Dakle, na Badnjak, matere i babe dale bi dičini komoštre, a ova bi zajedno trčala selon potežuć komoštre i stvarajući pri tom veliku buku. Mislite da je sve to bilo bez-veze? E nije, tako su se komoštre začađene čistile jednom godišnje, a mamama i bakama bile bi vraćene sjajne - kao nove. Pravit ću van i to da mi je sve ovo pravil Lucian Sintić iz Krka ki sako leto rošta s komoštre od 1973 leta, a dobro je i to da običaj ni izumro, da sako leto ima sve više onih ki roštaju a mogu roštat samo ako imaju svoje vlastite komoštre a sve to zdušno podržava Turistička zajednica grada Krka. Poć ću i ja ovo leto to sve vidit i u živo doživit aš san čula da će se potla i dobro pojist. I da van dan i jedan savjet, morda bolje da ne grete ni spat nego na Krčkoj placi komoštrat.
(Miranda Šebelja)





