ZAČ VOLIN MESOPUST
Milovan Kirinčić 04.03.2013.
Nagrađeni sastavak. Autor: Noa Kovačević, 4. razred OŠ Vrbnik
Va Vrbniku je plno običaji od starini. Jeden od njih je i mesopust i jako mi se pjaža.
On počne po Tri kraja a dura do Pepelnice.
Mesopusni običaji ostali su do denes. Za vrime Mesopusta seku nediju je maškarani tanec. Seki utorek i četrtek maškare redu po kućah. Zadnji mesopusni četrtek zove se Tusti.
Peče se žurenica, a za obed se kuhaju makaruni ze zvaceton. Na mesopusni četrtek dica potežu komoštra, a večer je maškarani tanec. Zadnju mesopusnu nediju tanca se na Placi pod sopeli a divojki se obelku va široke kamižoti.
Na mesopusni ponedijek mladići redu od divojki do divojki. Prije su parćivali na seden ur vjutrin, a dica bi za njimi tekli noseć njin košić i bocunić. Mlada kumpanija, ka re ke divojkah prvo leto obelčena je va belu.
Na mesopusni utorek kumpanije od mladić i muži redu jeden ke drugomu obelčeni va veštidih. Večer je zadnji mesopusni tanec. Na utorek se ne maškara, nego se re na tanec va lipoj robi.
Na sredu Pepelnicu, po maši se pali mesopust i čita tištament.
Meni se ovi mesopusni običaji jako pjažaju. Seku nediju se maškaran i ze kumpanijun od razreda tancan va sali. Kad budemo mladići i mi ćemo hodit va belu po divojkami. Jedva čekan!





