Registracija za nove korisnike
Zaboravili ste lozinku?
CROATIA - OTOK KRK
T e s t a m e n t - …
MENE ZOVU BODULO
Farm Frenzy 3Manage five different…
Black JackPoznat i pod nazivom…
Sparivanje gemovaObojajte što…
vijesti test 233
Ja ovo pod milin Bogon niš ne razumin.
13.05.2010.
Zoven se…ma nisan baš šigur. Tata me zove Ivica, mama Sunce mamino, dede Mali, mamica Zlato moje, brat…ma on me ne zove, on vavik reče Makni se, dosadan si ko buha, stric z Rike Bodulić. Pa kako ću onda znat kako se zoven. Iman 6 i ovoliko let. Vidite prsti. Ne znan kako ću napisat. Va školi su me naučili pisat, ali samo slova, a ne prsti.
Moran reć da više nisan va vrtiću, nego već san velik i gren va prvi razred prave škole. To je škola Dubašnica va Malinskoj a zove se… samo da se domislin. Ja mislin da se zove Frane Kršćen Zakopan. Razumin da je kršćen, ali zač su ga odmah zakopali ne znan. Moran to nikoga pitat. Ako ne zaburavin. Va školi mi je teta, ku ne zovemo više teta, nego meštrica. Ali ona se vavik onda jadi, aš da je moramo zvat učiteljica. Onda se polako navikavan da je tako i zoven. Pital san je ako je oženjena. Nasmela se je i rekla da je, ali ne oženjena nego udata. Ali i da ni, ja san ipak malo premali za nju. Nisan baš razumil ča je s tin otela reć, ma ni bitno. Rekla je da je prije ženidbe bila Komadina, a sad da više ni. Ma meni se isto tako čini da je i sad komadina od ženske.
Va školi san već naučil pisat i vela i mala slova. Tata je bil jako zadovoljan i rekal mi je da moren počet pisat memojari. Ja baš ne znan ča su to memojari, ali mi je mama rastumačila da su memojari ko nekakav dnevnik ki će mi donest čuda šoldi kada buden velik. Kada su mi rekli da puno šoldi znači i puno sladoleda i puno sličica nogometaši, malo san se ipak zamislel i mi se čini da to ni loša ideja.
Ja ću onda ipak počet pisat memojari. Ili dnevnik. Ma nema veze ča će to bit, glavno da bude sladoleda!
I prestat, aš me već bole prstići od pisanja. A i zove me mama da priden na vičeru. Već znan da ću morat najprvo prat ruki. Ko da ih neću odmah zašporkat z palačinkami.
14.05.2010.
Danas nas je meštrica naučila pisat datume, pa mislin da san ovo dobro napisal.
Videl san da su mi niki čitali ovaj moj dnevnik. Niki su rekli da je smišno, niki da je bez veze, a niki neka pišen na hrvackon zajiku, aš da me ne razumu previše. Pa na kon to onda zajiku ja pišen?
Pital san meštricu, ka se sada zove učiteljica, da kakov je to hrvacki zajik. Lipo mi je objasnila da to ni zajik, nego jezik, i da ga najbolje govore Hercegovci. Videl san da je neč nervozna, pak je nisan više niš pital. Ali čin san došal doma, pital san tatu ki su to ti Hercegovci. Tata je rekal da su to Hrvati iz Herceg i još nečega. A kad san pital ča je to Herceg i to još neč, rekal mi je da je to jedna druga država. Niš nis razumel, pa san pital a s kin onda zajikon govore Hrvati iz Hrvacke. Tata je malo mislel i onda mi je pripetal jednu dobru ćepu i rekal neka ga ne davin i neka se gren igrat van.
I ja san šal. Čera je bila va Malinskoj Sensa. Plovan, koga ne smimo zvat plovan nego velečasni, je rekal da nije Sensa nego Spasovo. Spasi me Bože od svega ovoga ča mi se prominilo od kad san partil va školu. Rekli su mi da ne govorin hrvacki nego niman pojma ki zajik, ili jezik, ča ja znan, plovan je sad velečasni, meštrica je učiteljica, Sensa je Spasovo… Još ću morat mamicu zvat grandmater kako je sve to partilo naopak.
Ma ja ću svejedno pisat z ovin mojin zajikon. Razumimo ga ja i moja mamica, a za drugih me baš briga.
Nego da se ja vrnen čerašnjoj Sensi. Posli maše su mladići tekli za siron. Otil san i ja, ali su mi rekli da teku samo neoženjeni mladići. Ma tr san i ja neoženjen. Svi su se počeli jako smet i rekli su mi da ja moran pojist još puno kruha i pekmeza da buden mladić. Niš onda, gren ja va kuhinju pojist nikoliko landi kruha z pekmezon da ča prije buden mladić.
17.05.2010.
Nesmin reć meštrici, ali ja skoro više naučin kada ni škole, nego va školi. Tako san naučil da su subota i nedilja vikend. I da se onda ne dela i ne gre va školu. I onda smo se tata i ja složili da je vikend lipši od svih drugih dani va šetimani. I sad znan sve dane va šetimani. Ponediljak, utorak, sreda, četrtak, petak i vikend.
Jedino je škoda da je bilo grdo vrime, pa nisan mogal poć igrat nogomet, ni pobirat šparoge.
Bilo mi je jako dosadno, pak san gjedal televiziju. Subotu večer smo svi zajedno gjedali puno pjevači ki su dobivali nekakve kipiće. Mama je rekla da su to Porini. Ma samo mi nije jasno kamo ih rabi porinut. Nike sakako s pozornice, ali druge ne znan.
Posli smo požalili ča smo to gjedali, aš nas je celi vikend davila mamica da je njen šćapić već star i grd i da bi i ona onakov kot ča ga je imela ona Osipica Lesica. Srića i Bog da ni otela i onakovu veštu i frizuru.
Pital san mamicu ča će njoj črljeni šćapić. Rekla mi je da su je zvali da nosi štafetu drugu Titu. Aš će tamo bit najmlaja omladinka, pa njoj rabi novi šćapić. I da mora bit baš črljeni. Pitala me je ako znan ki se drug Tito. Ja san rekal da ne znan, ali znan ki je prvi. Pa moj tata. On mi vavik reče TI TU sedi i ne mrdaj! Pogjedala me je ko da vidi črnog vraga, prekrižila se je, zela krunicu i neku malu črljenu knjižicu na koj su nacrtani kosir i batić i partila va svoju kamaru.
Danas smo bili z školun va Ponikve stavjat prsteni na tičiće. Malo su se jadili name, aš je meni bilo zabavnije jih tirat nego lovit. Meštrica je rekla da me više nikad neće zet kad opet budu stavjali prsteni. Ma briga me, stavit ću ja prsteni na kokoši od tete Mare. Samo kad je ne bude doma. Za svaki slučaj, ako ča parti po zlu.
Ja mislin da nimamo niš za domaći uradak, pa gren vidit morda ni doma tete Mare. Pak bin mogal stavit prsteni njenin kokošan. Ajmeeeeeeee…niman prsteni. Ma zet ću ja prsteni od koltrini. Mama je baš čera njurgala da jih je oprala, ali je dažjelo, pak ih je morala obisit mokre i nepopeglane. Bit će svi zadovoljni, teta Mare kad vidi da njoj kokoši imaju drvene prsteni, a mama kad vidi koltrini na podu. Bit će mi šiguro jako zahvalna da ih ne mora sama znemat da jih popegla. Morda mi bude načinila palačinki za vičeru.
Gren ća.
21.05.2010.
Danas mi je bilo jako lipo va školi. Najviše na velom odmoru. Bilo je malo lipje vrime, pa smo napucavali balu. Danas nismo razbili ni jednu jedinu poneštru na školi. Čudo Božje. Za marendu smo dobili krafnu z čokoladun. Ja sam dobil dvi, aš san minjal četiri sličice nogometaši za jednu krafnu. Samo ne znan kako je mama to znala odmah čim san došal doma. Ja joj to nis rekal, ne zato ča nisam otel, nego zato aš san zaboravil. Mislel san da će mislit da su vele kafene fleki na majici, trapericah i tenisicah modni detalji. Ma ni. Šiguro su joj bile sumnjive iste takove fleki na nosu, čelu i oko usti. Bila je jako jadna na mene i kričala je.
Poslala me ne tuširanje prije obeda. A ja sam bil lačan ko vuk. Partil san, ali je jopet mama kričala na me da neka ne nosin "Alana Forda" pod tuš. Zač ne, niman pojma! Ako se već ja moran prat, zač ne bi mogal i Alan Ford?
I tako san se otuširal samo ja. Kad san došal u kuhinju, mama je klafrala na telefon. Iskoristil san to i malo pogjedal va frižider. Tamo je bil jedan lipi komad čokoladne torte. S gušton san zagrizal dobar kus. Mljac. Ali evo mame. Opet je počela kričat na me. Kako je jopet videla ča san načinil. A lipo san sve progutal, obrisal ruke va majicu i zaprl vrata od frižidera… I noš, jopet san moral na tuširanje…
Kad sam došal nazad videl san da mama opet telefonira. Opet ćakula s teton Maron. Ne znan zač ćakulaju na telefon, kada teta Mare živi va kući odmah do naše. Pak moru lipo ćakulat priko poneštri. Šiguro koriste telefon da ih druge susede ne bi čule. Baš je mama govorila da je njen Ivić donesal nekakvu školu modernog engleskog zajika od neke Jadre, Jedre, nisan baš dobro čul ime, ali da celo zapodne to sluša, i uči govorit. Ma ja san čul da se samo smije slušajuć to.
Fala Bogu, mama prestala klafrat na telefon i stavila obed na stol. Ali kad mi je stavila na pjat, rekal san da više nis lačan. Videl san da me je čudno pogjedala i rekla da san maloprije bil lačan kao vuk. Pa san, ali nikad nisan videl da vuk jede špinat. Svi su se počeli jako smijat. Onda je mama počela držat prodiku da je čera bil dan od nikakove pretilost. Nisan niš razumel, ali mi je onda lipo objasnila da je to dan debelih judi. Poboga, nisan znal da i debeli judi imaju svoj blagdan. Lipo, lipo. Samo mi ni jasno zač ga onda slavimo sa špinaton i ribicami na lešo, a ne sa šurlicami i gulašom. Vidil san u očima mame, da će opet bit nevera, pa san zamučal. Ali onda se dogodilo čudo – i tata se složil sa menon.
Moran poć, aš me vani zovu da gremo pobirat šparogi.
23.05.2010.
Evo opet je došal vikend. A tata i ja jako volimo vikend. Mama baš i ne, aš govori da onda mora puno delat po kući. Pomislel san da onda mora puno i klafrat sa teton Maron, ali to nisan rekal naglas. Odkada gren va školu san postal puno pametniji, pa baš i ne govorin sve naglas.
Čera smo bili va Veji. Uh, sad san se domislel da se meštrica jadi kad rečemo Veja, da moramo govorit po hrvatski i da je to Krk. Bedasto. Onda ne znan govori se o otoku ili o gradu, kad se obadva zovu Krk. A i glupo mi zgjeda da se one jude ki žive tamo zove Krkani. Meni je lipše zvat ih Vejani, pa ću ja pisat Veja i Vejani. A va školi ću govorit kako meštrica išće.
Ča san ono mislel napisat. Skoro san zaburavel. Domislel san se. Tata je šal na tehnički z auton. Zel je i mene. Šiguro je mislel da će lagje pasat tamo z menon ko pomoćnikon. Onaj barba va plavoj kuti je sve pregjedaval i stalno neč grintal. Tata se je nerviral. Najviše se je razjadil kad ga je barba pital ako je to oldtajmer. Odbrusil mu je da još nima ni dvajset let i da izgleda ko nov. Nisan šigur, ali mislin da je mislel na auto, a ne na sebe. Na kraju je platil dvi i pol tisuće njin bogi na blagajni. A ja san mislel da su to kuni.
Posli smo šli va Konzum. Mama mu je dala papirić ča sve mora kupit. Pregjedal je sve žepi, ali hartica je, kako je rekal, misteriozno nestala. Ma ne verujem da su je ukrali marsovci. Ili ju je zgubil ili zaboravil doma. Onda smo hodeli po Konzumu i gjedali ako se morda domislimo ča je pisalo na toj „misteriozno nestaloj“ hartici. Tata je najviše pregjedaval bire, ma baš ne verujen da mu ih je mama naručila. Bilo mi je dosadno, pa san ja šal pregjedavat stripove.
Tamo san videl i tampone z krilima. Rekal san onoj teti da mi da dva. Čudno me gjedala i pitala ča će mi to. Rekal san da nisu za mene, nego za mojega mlajeg brata. Videl san na televiziji da, ako jih koristiš moreš bez problema plivat i vozit biciklu. A on ima četiri leta i trenutno ne more ni jedno ni drugo. Pak će mu ti tamponi dobro doć. Skupilo se puno judi oko mene i smijali su se. Šiguro i oni imaju dicu kima će to dobro doć. Tata je videl gužvu oko mene. Dotekal je, potegnul me za ruku i šli smo ća. I na kraju san ja bil kriv da nismo niš kupili, a ne on ki je zgubil šalabahter.
Onda smo šli doli va Veju. Tamo je na rivi bil nekakov sajam od Eko, Eto, Eno… nisan baš sve zapamtil, osim onog zadnjeg od Vina. Obahajali smo sve štandi i kušali sve ča je bilo tamo. Bilo je svakakovih sirići, meda… Tata me celo vrime držal za ruku da opet ne bin načinil kakovu bedastoću. Ni mi dal da kušan vino, aš da san još premal za to. Ali je zato on probal sve moguće rakije i vina. Rekal je da mora nać dobro crno vino, aš da mu je dohtor rekal da je to dobro za dizanje tlaka. Isto tako i belo za spuštanje tlaka. Valjda mu je i to rekal dohtor. Jedan barba tamo je rekal da mu ipak najboje digne tlak njegova žena. I tata se složil, pak ni kupil ni jedno vino, nego samo jedan komad sira od ovce i bočicu meda. Od pčeli, aš mislin da ovce ne delaju med, nego samo sir.
Kad smo došli doma, i mama i mamica su se križali. Za mamu san odmah znal da to ni radi molitve, nego kad je videla da tata ni niš kupil ča mu je naručila. Ali zač se mamica križa, a nima ni krunicu ni molitvenik va rukah. Onda je rekla da neka maknemo taj med iz kuće, aš da more bit jako opasan. Baš je čitala da su Dobrinjski lovci napucali jednoga medvida, aš je došal na Kras jist med. Pak onda neka pazimo da i nas ne bi lovci z Krasa napucali. Ajme kako smo se smijali. Samo meni ni jasno od kud sad medvid na otoku, kad su rekli da jih ovdi nima već nikoliko let.
Gren ća, aš mama zove na obed. Samo da opet ne bude zdrava hrana na pjatu. Ako mi ne bude dobro, reć ću da nisan lačan, aš san se pričestil na maši.
25.05.2010.
Jutros me ni morala mama budit, aš me je probudila velika krika-buka po kući. Ni mi vrag dal mira i šal san vidit ča je to. Svi su bili već stanjeni. Čak i moj mali brat od 4 leta. Mamica je bila obučena va najboju veštu ku je čuvala za smrt, z krunicon i crvenon zvezdon va rukah. Tumačila je da je danas veli zapovidani blagdan i da ona mora poć na mašu. Videl san da joj pokušavaju objasnit da danas ni nikakov blagdan. Da su Duhovi bili u nediju, a današnji Duhovski utorek slave Omišjani, a ne Dubašjani. Ali ni se dala. Rekla je da je danas njen dan, dan mladosti i da ona mora poć va crikvu proslavit. Tata se prevalil od smiha, aš da je to lipa mladost od 80 i neč let.
Ne znan kako je finila ta štorija z blagdanon od mladosti i mamicun, aš san moral poć ranije va školu. Zaburavil san ča smo imeli za zadaću, pa san šal vidit ako moren od koga prepisat. Kad san došal va školu, zaburavil san opet na zadaću, aš je Marko dosenal balu, pa smo malo napucavali.
Kad me je meštrica pitala di mi je zadaća, ja san rekal da je i ona misteriozno nestala, kao neki dan i onaj tatin papirić, na ki mu je mama napisala ča da kupi va Konzumu. Samo je rekla da se nada da će se sutra misteriozno pojavit. Valjda je mislila na moju zadaću.
Va školi mi se dogodila jedna mala neugodnost. Pobigal mi je golub, kako često reče moj barba Ivić. Aš da je grdo reć da san prdnul. To se dosta jako čulo, ma san se snašal i glasno rekal mojoj prijateljici Maji da, ako joj je neugodno, neka reče da san ja to napravil. Jako se zacrvenila i rekla mi je da san bezobrazan. I da više neće z menon pričat. Ipak meštrica ni pala na to i izbacila me van. Sad mi ni jasno koga je ona kaznila, mene ki san šal van na sunce i čisti zrak, ili celi razred ki su ostali nutri va razredu va smrdežu.
Kad san došal doma, mama me pitala kadi mi je jakna. Kakova sad jakna, kad je vani jako teplo??? Rekla je da je jutros bilo hladno i da san šal va školu va jakni. Domislel san se da je baš tako bilo, ali ča ću sad drugo reć, nego da ja i ona misteriozno nestala. Već je partila potegnut me za vlasi, ali se javila mamica i rekla da neka me pusti na miru, aš se stvarno u zadnje vrime događaju misteriozni nestanci. Počela je objašnjavat da je va luki va Malinskoj bil brod „Margarita“ na pol potopljen, pak se ona parićivala da va njemu iznajmi apartman. Mogla bi celo leto toćat nogi va moru, a da ni ne gre van z kabine. Aš njoj je dohtor rekal da je to dobro za reumu. A onda je i taj brod misteriozno nestal. A mogal je bit lipa turistička atrakcija, ko kosi toranj va Pici i kip slobode va Novijorku. Prekrižila se i partila va svoju kamaru.
Mama je kuhala obed i klafrala priko poneštre z teton Maron. Šiguro nisi bile nikakove tajni, aš bi inače ćakulale priko telefona. Čul san da ćakulaju o nikakovoj nesritnoj jubavi izmedju Romea Borata od Zelenog češnjaka i Julije Jace od Bijele kapulice. Ali da ta jubav ne more bit ostvarena nikako, aš da su oni z drugih plemena ki se jako ne vole. I onda su svi od našega plemena protiv i žele da se ona voli z našim Zokijen Parisom. Aš da je i on od plemena Kapulice, samo crvene. Mama je rekla da ne bi bilo dobro da se oni otruju, kako va onoj nikakovoj knjigi. Teta Mare je rekla da njoj jih je ipak malo žal, aš da jih je lipo vidit kako se pozdravjaju z nosići, kako Eskimi. Imila je i jednu njihovu sličicu.
Ali je ipak rekla da je boje da se otruju oni sami, nego da potruju obadva plemena, naše i njihovo. Opet nisan niš razumil.
Rekal san mami da neč smrdi z kuhinje. Ćapala se za glavu, rekla teti Mari da joj obed gori, i potekla va kuhinju. Neka i ja mamu jedanput vidin kako teče.
Za obed smo imeli saki dva jaja na oko. Mamica je brundala da kakov je to blagdanski obed. Tata je grdo gjedal, ali ni brundal. Aš se mama na njega jadi još od vikenda kad ni niš donesal z butige ča mu je naručila. Šapnul mi je da nebi otel još pogoršat stvar, aš sad doma ima slike, ali nima tona. Ipak da je i to boje nego da nestane i sliki. Mama je objasnila je otela peć puricu i mlade kumpiriće, ali kad je već to počela pripravjat, se domislela da je to teška hrana i da je onda radije parićala friška domaća jaja. Ni ja nisan otil spominjat onaj smrdež z kuhinje, aš ni ja ne volin sliku bez tona doma.
Pompjeri brži od Superborata
30. svibnja 2010.
Priko šetemane baš i niman puno vrimena za pisat dnevnik, aš iman puno posla. Moran hodit va školu saki dan, aš imaju dobre marende. A zapolne moran igrat nogomet.
Puno se toga dogadjalo ovih dan, ali san još više toga zaburavil.
Domislel san se nečega. Rekla mi je neki dan meštrica neka na ploči nacrtan neč okruglo. Nisan se mogal na brzinu ničeg drugog domislit, pa san nacrtal guzu. Meštrica je poludela i izbacila me van. Baš san naletil na ravnatelja. Pital me ča ja tu delan za vrime nastave. A ja ne znan lagat, pak san mu rekal da me je izbacila učiteljica. Pital me je kadi je sad ona. Ja san mu opet iskreno rekal da je va razredu i briše guzu. I zbrisal san i ja.
Moran reć da smo riješili jednu misteriju nestanka. Ma ča jednu, čak dvi. Drugi dan san našal onu moju jaknu na igralištu va jarku. Kad san je donesal doma, i mama je poludela. Valjda je to zarazno va zadnje vrime. Ili je neč va rodu z meštricun, ali to ona ne zna. Rekla mi je da to ne more bit moja jakna, aš je moja bila svitlo plava, a ova je grdo kafeno-zelena. Ma valjda joj ni prijal noćni zrak. A kako ne bin bil šigur da je to moja, kad san va žepu našal onaj papirić na komu je pisalo ča je tata moral kupit va butigi. I ni mi jasno zač je mama bila još jadnija, mesto da bude sretna da smo riješili dva misteriozna nestanka. Još da riješimo misteriju broda "Margarita".
Pital san sinoć tatu ako ćemo gledati naše Feminemice kako kantaju va Tovaru. Rekal je da neće kantat va Tovaru, nego va Oslu. Uf, ma vele li razlike. Nastavil je da ustvari one neće kantat ni oslu ni tovaru, aš da su ispale. Ma ni mi jasno zač prije nisu bolje naučile jahat, pak ne bi ispale z osla. I tako ih sinoć nismo gjedali.
Danas zapolne je dažjelo, pak nismo mogli poć van. Zato je teta Mare prišla k nami na kafe od kafe. Donesla je nikakove sličice i pravjala je koliko se tužnih stvari dogajalo ovih dan. Mamica je odmah složila i rekla da je bila tužna da na maši za dan mladosti ni predikal neki don Kaćunko, i da nisu došli kantat zbor z Blajburga i njihov solist, neki barba Stipe Mesić. Rekla je da je najviše bil razočaran njihov omladinski sekretar, aš da su mu svi obećali prit. Svi su je grdo pogjedali i rekli neka ne blebeće gluposti. Nadurila se je i odšepala va svoju kamaru.
Onda je teta Mare pravjala da se je teta Joca, ku svi zova Jadra ili Jedra, skrila va nikakov lift i čekala svog supermena Borata Šukera da je dojde nać i spasit.
Ali onda su stvar zeznuli pompjeri i prvi su je našli tamo i spasili ju. Aš su se valjda strašili da bi prije mogal doć po nju pravi zmaj nego taj zmajček. Mama i teta Mare su šmrcale da to ni ispalo ni malo romantično. Tata je rekal da one nisu normalne, dignul se i od jada šal va oštariju na biru. Sad mu ni ni daž pačil. I ja san otil poć z njin, ali je rekal da oštarija ni za malu dicu. Javila se mama, da ni ni za velu. Ča je z tin mislela, niman pojma. Na tatu ni šiguro, aš on ni više dite. Baren tako on misli. Ili je? Totalno san zbunjen.
Spasili su me palačinki z siron.
Referendum-dum
10. lipnja 2010.
Pasani vikend nisan mogal pisat ovaj dnevnik, aš smo bili va Zagrebu va posjeti njihovoj školi. Upoznal san tamo nikoliko novih prijatelji. Peljali su me po Zagrebu kako kozicu na konopčiću da se ne zgubin. Odpeljali su me da vidin njihovo more ko zovu Jadrun ili tako nikako. Ma i bilo je je baš jadno. Naša dubašljanska vala izgjeda kako ocean prema tomu njihovomu moru. Boje bi bilo da su me odpejali va zoološki vrt. To je rekla i moja prijateljica Maja. Malo se zezala i pitala nas je ako znamo razliku izmedju belog i mrkog medvida. Odmah se javil naš lumen Marko i rekal da on zna. Da mrki medvid ima veće uši od beloga. Kako smo se smijali… Na kraju je Maja rekla da je morda i boje, aš da bi me mogli tamo zadržat kako nikakov eksponat. Ne znan ča to znači, aš nisan stigal pitat. Ma kad je brzo došla pica, pa smo navalili na nju ko mutavi.
Pasanu šetemanu smo imali ovdi zoološki vrt. Va moru su slikali jednoga morskog pasa ki je bil dug 5 metar. Uvečer je narasal na 6 metar. Drugi dan su ga slikali i narasal je već na 7 metar. Treći dan se ulovil na vršu i kad su ga zmirili bil je dug 8 metar. Ovdi mi dvi stvari nisu jasne. Kako more va 3 dani narast za 3 metra. I kako se tako velik more ulovit va vršu. Ne razumin.
Čera je tata došal doma i rekal je da su konačno va našoj općini odlučili da će prestat spat. Da je va to šigur, aš da je na njihovoj oglasnoj ploči videl da prodaju madrac.
Mama je odmah rekla da bi i njemu bilo vrime da malo manje hrče, a više dela. Da z njegovun plaćun ne moremo živit, pa neka neč zaradi u fušu. Da je to sad jako popularno. Obećal je da će i šal je van. Malo san se bojal da se radi popularnosti i fušanja ne slika gol za kakove novine, kako znaju delat neke tete i barbe.
Ali je brzo došal nazad i rekal da neće bit niš od dela, aš da više ne more pogadjat rezultati utakmica u kladionici, aš da su mu izvori finili va reštu. Majko Božja kako ja to niš ne razumin.
Danas je rekal da opet ide fušat. Opet je došal doma tužan. Rekal je da je opet zakasnil. Mama se jadila na njega, aš da vavik kasni. Da se čudi kako ni zakasnil i na svoje rođenje. Rekal je da ni on kriv ni za to, aš da su mu rekli da ga je mama natirala da se rodi, a da se njega pitalo, on bi još i danas bil tamo va teplomu. Lipo je objasnil da ni za ovo danas ni kriv. Lipo se dogovoril z jednin barbon z Veje ki ima dobru biru, da će njin jedna teta iz Hrvackog Zavoda za Zdravo Obogaćivanje dat nike šoldi ke su njin tamo višak, pa da će onda to lipo svi podilit i dat svojin ženan za dan žena. Ali da više ni bilo ni te tete, a ni tog barbe, aš da su šli svirati klavir va Via Romu. Mamica se javila da je i on mogal učit svirat klavir, pak da je mogal i on poć š njimi va Via Romu. I mama i tata su graknuli na nju. Ma brižna mamica, vavik je ona kriva. Niki put mi ju je malo i žal.
Gjedali smo na televiziji kako je Severina pokazivala kako i ona zna pisat. Tata je bil tako oduševljen da re rekal da će i on jutra zet papiriće i poć okolo provjeravat ako i drugi judi znaju pisat. Ja san odmah rekal da ću mu i ja pokazat da i ja znan pisat. Uf. Rekal je da ja ne moren, aš da san mali. A da se to zove referendumdum i da samo veli judi moru pokazivat da znaju pisat kako i Severina. To ni pošteno. I ja ću jutra organizirat referendumdum kadi će moć i dica pokazat da i ona znaju pisat. Morda i boje nego veli.
Božić
21. prosinca 2010.
Već dugo nisam pisal dnevnik. Ne zato ča san len, nego zato aš mi se ne da pisat.
Danas san odlučil ipak malo sest i napisat nikoliko besed. Prikojutra ćemo dobit svjedodžbi, pak se bojin da onda neću moć niš pisat. A ni sidit na guzici, aš će bit črljena. Morda buden imal sriće da se opet ponovi onaj e-kolaps kot va prošlon razredu, pak ne dobijemo svjedodžbi. Ma kakove san sriće, to se vjerovatno neće dogodit.
Ne znan ako san napisal do sada, ali ja san već va drugon razredu. Ja san već velik dečko. Iman broj postola 38.
Samo nisan šigur ča će bit posli tih svjedodžbi. Da li ću poć va treći razred, ostat va drugon još jedno polugodište, ili će me vratit va prvi. To ne bin otel, aš tamo zi nekin prvašići dolaze mame i side zi njimi va razredu ili sprid njega. Ma meni je to bez veze.
Ovo polugodište bilo je dosta burnih i južnih dani. Bilo je burno i pasani petak, kada smo imali evakuaciju. Ki ne zna ča to znači, ja ću mu objasnit. To je ono kad učitelji istjeraju sve učenike iz škole, ali ne zato ča su baš svi bili zločesti. Ja siguro nisan bil. Baren taj dan. I onda poslije učenika izjure za njima i svi učitelji. I teta kuharica. Ma samo mi je čudno da vavik biraju dan kad ili pada daž ili je jako zima. Da je baren ostalo sniga ki je padal dan prije, bi se mogli grudat. Ovako smo se samo smrzavali, aš nismo imili vrimena ni jakni zet.
Toga dana su se neki veliki učenici špricali zi onin spreji ki lipo vonjaju. A jedan učenik, ko je svako leto va drugoj školi, je počel špricat zi nečin ča jako smrdi, tira suze na oči i počeli smo svi jako kašljat i davit se. Neki je bubnul da je taj učenik Domagoj, a mi svi drugi da smo Trpimiri i Suzane.
Jutri je va Veji veli koncert za Božić. Ja znan da se toga dana rodil mali Isusić. Tamo će kantat jako puno učenici i učenica od celoga otoka. I ja sam se prijavil da bin i ja tamo kantal. Otil san vidit kako će se opet Isusić rodit. A bil bin i blizu one male ka mi se jako pježa. Znate, to je ona mala ka va mojen razredu sidi sprid mene. Kako da van objasnin? Ma znate, ima svitlo kafene vlasi i sidi dvi klupi sprid mene, desno od moje live ruki.
Ali kada su čuli da san se i ja prijavil za kantat, svi su se počeli vajat od smiha. Kada san došal doma san se potužil tati ča mi se to dogodilo. On me je pital da ča zaključujen zi toga. Rekal san da zakjučujen da san jako duhovit. Malo me čudno pogjedal i rekal da san bedak i da ni to, nego da kantan kako tovar kad se upucava kobili.
Moran prestat pisat, aš mama zove na vičeru. Baš me zanima ča će bit za jist. Ja i tata imamo jednak ukus za hranu. Jedanput volimo meso, a ne volimo zelenjavu. Drugi put ne volimo zelenjavu, a volimo meso.
Ala bog, svi mi budite mirni i dobri za Božić, pa će van bit mirno i dobro celo drugo leto!
puta
| N | P | U | S | Č | P | S |
| 1 | 2 | 3 | 4 | 5 | ||
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | ||
.jpg)
