Otok Krk

10. lipnja 2010.

Pasani vikend nisan mogal pisat ovaj dnevnik, aš smo bili va Zagrebu va posjeti njihovoj školi. Upoznal san tamo nikoliko novih prijatelji. Peljali su me po Zagrebu kako kozicu na konopčiću da se ne zgubin. Odpeljali su me da vidin njihovo more ko zovu Jadrun ili tako nikako. Ma i bilo je je baš jadno. Naša dubašljanska vala izgjeda kako ocean prema tomu njihovomu moru. Boje bi bilo da su me odpejali va zoološki vrt. To je rekla i moja prijateljica Maja. Malo se zezala i pitala nas je ako znamo razliku izmedju belog i mrkog medvida. Odmah se javil naš lumen Marko i rekal da on zna. Da mrki medvid ima veće uši od beloga. Kako smo se smijali… Na kraju je Maja rekla da je morda i boje, aš da bi me mogli tamo zadržat kako nikakov eksponat. Ne znan ča to znači, aš nisan stigal pitat. Ma kad je brzo došla pica, pa smo navalili na nju ko mutavi.

Pasanu šetemanu smo imali ovdi zoološki vrt. Va moru su slikali jednoga morskog pasa ki je bil dug 5 metar. Uvečer je narasal na 6 metar. Drugi dan su ga slikali i narasal je već na 7 metar. Treći dan se ulovil na vršu i kad su ga zmirili bil je dug 8 metar. Ovdi mi dvi stvari nisu jasne. Kako more va 3 dani narast za 3 metra. I kako se tako velik more ulovit va vršu. Ne razumin.

Čera je tata došal doma i rekal je da su konačno va našoj općini odlučili da će prestat spat. Da je va to šigur, aš da je na njihovoj oglasnoj ploči videl da prodaju madrac.

Mama je odmah rekla da bi i njemu bilo vrime da malo manje hrče, a više dela. Da z njegovun plaćun ne moremo živit, pa neka neč zaradi u fušu. Da je to sad jako popularno. Obećal je da će i šal je van. Malo san se bojal da se radi popularnosti i fušanja ne slika gol za kakove novine, kako znaju delat neke tete i barbe.

Ali je brzo došal nazad i rekal da neće bit niš od dela, aš da više  ne more pogadjat rezultati utakmica u kladionici, aš da su mu izvori finili va reštu. Majko Božja kako ja to niš ne razumin.

Danas je rekal da opet ide fušat. Opet je došal doma tužan. Rekal je da je opet zakasnil. Mama se jadila na njega, aš da vavik kasni. Da se čudi kako ni zakasnil i na svoje rođenje. Rekal je da ni on kriv ni za to, aš da su mu rekli da ga je mama natirala da se rodi, a da se njega pitalo, on bi još i danas bil tamo va teplomu. Lipo je objasnil da ni za ovo danas ni kriv. Lipo se dogovoril z jednin barbon z Veje ki ima dobru biru, da će njin jedna teta iz Hrvackog Zavoda za Zdravo Obogaćivanje dat nike šoldi ke su njin tamo višak, pa da će onda to lipo svi podilit i dat svojin ženan za dan žena. Ali da više ni bilo ni te tete, a ni tog barbe, aš da su šli svirati klavir va Via Romu. Mamica se javila da je i on mogal učit svirat klavir, pak da je mogal i on poć š njimi svirat va Via Romu. I mama i tata su graknuli na nju. Ma brižna mamica, vavik je ona kriva. Niki put mi ju je malo i žal.

Gjedali smo na televiziji kako je Severina pokazivala kako i ona zna pisat. Tata je bil tako oduševljen da je rekal da će i on jutra zet papiriće i poć okolo provjeravat ako i drugi judi znaju pisat. Ja san odmah rekal da ću mu i ja pokazat da i ja znan pisat. Uf. Rekal je da ja ne moren, aš da san mali. A da se to zove referendumdum i da samo veli judi moru pokazivat da znaju pisat kako i Severina. To ni pošteno. I ja ću jutra organizirat referendumdum kadi će moć i dica pokazat da i ona znaju pisat. Morda i boje nego veli.

Tu mi je dnevnik na sigurnom

http://otok-krk.org/blog/

Vi ste stotisućiti posjetitelj ovog najboljeg otočno-krčkog portala!

Budući da je ljeto, voljni smo Vam izaći u susret i, ako želite, možemo Vam zamijeniti taj stan za prekrasno mjesto u omiljenom kampiralištu talijanskih kampera na parkiralištu odmah ispred Krčkog mosta. Isto kao i talijanski turisti, i Vi ćete biti oslobođeni plaćanja boravišne pristojbe, tako da onda Vašu novčanu nagradu možete zamijeniti za skoro 10 otočnih pizza i 2,3 deca negazirane vode Jana.